quen somos
Viña Moraima, S.Coop.Galega é un proxecto que se crea na localidade pontevedresa de Barro. Unha das principais razóns para levalo a cabo é a tradición colleiteira secular de Barro, que forneceu de viño á cidade de Pontevedra. Os socios desta adega antes de seren viticultores foron colleiteiros, cando os restauradores de Pontevedra ían buscar o viño polas pequenas adegas das casas de Barro. Cos novos tempos, estes colleiteiros deixaron de elaborar o viño, as súas pequenas adegas de chan de terra xa non cumprían coas novas normativas cada vez máis restritivas e pasaron a vender a uva ás grandes adegas.
Viña Moraima, S.Coop.Galega trata de recuperar unha forma de facer as cousas, fundando unha adega na que elaborar o seu propio viño, coa idea clara de facer unha aposta seria pola calidade. Para isto, nada mellor que conxugar o bo facer e tradición de varias xeracións de viticultores e colleiteiros, coa incorporación de xente nova formada e preparada en viticultura e enoloxía que logre compaxinar estes dous mundos e plasmalos nun viño. Todos teñen un obxectivo común: poñer en valor o seu saber vitivinícola e o potencial das súas viñas para sacar ó mercado un dos mellores albariños da D. O. Rías Baixas.
