VIII A Emoción dos Viños
A VIII edición da Emoción dos Viños tivo lugar os pasados días 27 e 28 de outubro. Despois de pasar por Tui e Celanova, nesta ocasión o evento tivo lugar no noso concello, en Barro (Pontevedra), de aí que o viviramos dun xeito moi especial. Participar neste evento foi unha grande oportunidade, xa que se comparte tempo e experiencias con xente afín, tanto os do propio sector como profesionais que acoden á exposición. E, sobre todo con todas esas persoas ás que lles gusta tanto o viño e; que queren saber cousas sobre o que teñen na súa copa.
Se ademais o evento é na nosa casa, a felicidade é maior.
A Emoción dos Viños é unha ocasión única para achegarse a viños de Galicia, España e Portugal aos que dificilmente se pode acceder con facilidade. É ocasión de coñecer viños de pequenas adegas, de cultivos ecolóxicos ou biodinámicos, variedades testimoniais ou elaboracións experimentais. En resumo: coñecer viños que polas súas características diferenciadas dos demais, queren e conseguen emocionarnos, e coa xente que está detrás de cada un deles.
En Viña Moraima quixemos presentar aos asistentes tres dos nosos viños:
- Moraima Albariño 2017, elaborado en gran parte con uva procedemente de cepas prefiloxéricas e de patrón directo.
- Moraima Caíño 2016, tamén procedente de viñas prefiloxéricas, que por primeira vez presentamos con 14 meses de crianza en barrica.
- Mausiño 2017, vinificación experimental realizada coa variedade ratiño de cepas centenarias e prefiloxéricas. Non se comercializa e esta é unha das contadas ocasións na que o público interesado pode acceder a él.
Temos, como non, que dar as grazas ao Concello de Barro por acoller o evento no Pazo da Crega, e aos organizadores do acontecemento e (en especial aos amigos Marina Cruces e Antonio Portela) pola súa loita por reivindicar o viño como ser vivo e totalmente diferente un de outro. E, por suposto, agradecerlles tamén que nos invitaran a formar parte deste senlleiro evento.
Agardamos a seguinte edición, con expectación, con emoción.